काठमाडौँ – नेपाली भाषामा अनुवाद गरिएको आचार्य शान्तिदेव विरचित बोधिचर्यावतार पुस्तक विमोचन गरिएको छ । राजधानीको बौद्ध स्थित बिहिबार एक कार्यक्रमको आयोजना गरी बौद्ध धर्म गुरु किडोङ साम्तेलिङ गोन्पाका श्रद्धेय खेन् रिन्पोछेज्यूले पुस्तकको लोकार्पण गर्नुभएको हो ।

भगवान बुद्धको अमृतमय वचन सबैले सजिलै अध्ययन गर्न र बुझ्न सकुन् भन्ने उद्देश्यले अनुवाद गरिएको पुस्तक बौद्ध धर्मको महत्वपूर्ण दर्शन हो । बुद्धवचन अनुवाद समिति नेपालका अध्यक्ष एवम् वरिष्ठ अनुवादक टिका शेर्पा (थुप्तेन काल्साङ) ले अनुवाद गरिएको पुस्तकको प्रकाशक तेन्जिङ्ग दावा शेर्पाले गर्नु भएको छ ।
कार्यक्रमका प्रमुख अतिथि एवम् किडोन साम्तेलिङ गोन्पाका प्रमुख श्रद्धय धर्मगुरु खेन् रिन्पोक्षे ज्युले आचार्य शान्तिदेवले रचना गर्नु भएको बोधिचर्यावतार नेपालीमा अनुवाद गरिएको प्रति खुसी व्यक्त गर्दै यसरी नै बोद्ध दर्शनको विस्तार गर्न सक्ने बताउनु भयो ।

यसैगरि नेपाल बौद्ध महासंघका अध्यक्ष आचार्य नुर्वु शेर्पाले बौद्ध धर्मको महत्वपूर्ण ग्रन्थको विषयमा विश्लेशन गर्नु हुदैँ बुद्धत्व प्राप्त गर्न दर्शन बुझ्नु पर्ने र त्यस अनुसार व्यवाहारमा समेत लागु गर्नुपर्ने बताउनु भयो । बौद्ध धर्मको लोकप्रिय ग्रन्थको अध्ययन पश्चात चिन्तन गरेर पढेका कुरालाई विवेचना गर्दै भावना गर्न सकेमा जोसुकैले पनि मूल–भवलाई छेदन गर्न सकिने बताउनु भयो ।

कार्यक्रममा बौद्ध दर्शन प्रवद्र्धन तथा गुम्बा विकास समितिका अध्यक्ष गेशे जिग्डोल लामाले सबै सत्वहरुको सुखलाई प्रमुख आलम्बन बनाएर आचार्य शान्तिदेवले बोधिचर्यावतार ग्रन्थलाई पूर्णता दिनु भएकोले यो ग्रन्थ अत्यन्त महत्वपूर्ण, मोक्षप्रदायक र कल्याणकारी भएको बताउनु भयो । एक हजार श्लोकमा रहेको यो बोधिचर्यावतार पुस्तकको महत्व बुझ्न सक्नु पर्नेमा जोड दिदै पुस्तक अनुवादक र प्रकाशकको यो पवित्र कार्यको प्रशंसा गर्नु भयो । पूर्व मन्त्री आङ छिरिङ शेर्पाले नेपालमा बौद्ध धर्मको संरचनाहरुको नष्ठ गरिएकै कारण नेपालको विकास हुन नसकेको भन्दै धर्मनिरपेक्ष राज्यमा सबै धर्मलाई सम्मान रुपमा हेर्न सक्नु पर्ने बताउनु भयो ।

बौद्धनाथ क्षेत्र विकास समितिका कार्यकारी निर्देशक वसन्त लामाले पवित्र कार्यको प्रशंसा गर्दै बौद्ध दर्शणलाई हरेकले सहज रुपले बुझ्न सक्ने पुस्तकको अनुवाद गर्नु ऐतिहासिक कार्य रहेको बताउनु भयो ।

विमोचन कार्यक्रमको समापन मन्तव्य राख्नु हुदै बुद्ध वचन अनुवाद समिति नेपालका अध्यक्ष एवम् अनुवादक टिका शेर्पाले पुस्तका प्रकाशक गर्न महत्वपूर्ण सहयोग गनु हुने पुस्तक अनुवादको क्रममा सहयोग गर्ने सबैलाई धन्यवाद दिदै बौद्ध धर्मको महत्वपूर्ण दर्शनहरु अनुवाद गरि सबैलाई बुझाउने कार्यमा निरन्तर लागि पर्ने प्रतिबद्धता गर्नु भयो।