दुई विधवा महिलाले सगरमाथा आरोहण गर्ने घोषण गरेका छन् । सोलुखुम्बु पासाङल्हमु गाउपालिका वडा नं. ४ खुम्जुङकी निमा डोमा शेर्पा र खुम्जुङ पाङपोचेकी र्फुदिकी शेर्पाले यस्तो घोषण गरेका हुन् । हिमाल आरोहणका क्रममा दिबंगत भएका आफ्नो पतिका सम्मानका लागि विश्वको सर्वोच्च शिखर सगरमाथाको आरोहण गर्न लागेको बुधबार आयोजित पत्रकार सम्मेलनमा जानकारी दिएको थियो ।
निमा डोमाका पति छिरिङ ओङछु शेर्पा सगरमाथा आरोहणका क्रममा सन् २०१४मा हिमपहिरोमा परि दिवंगत हुनुभएको थियो भने र्फुदिकीकी पति मिङमार शेर्पाको सन् २०१३मा निधन भएको थियो । दुवै विधुवा महिलाले ‘हामीले पनि गर्न सक्छौँ’ भन्ने नाराका साथ आगमी चैत्र महिनामा सगरमाथा आरोहण अभियान २०१९का नाममा सगरमाथा आरोहण गर्ने तयारी गरेको हुन् । दुबै जनाले गत मङसिरमा ६१८९ मि. को सोलुस्थित आईसल्यान्ड पिक र गत कार्तिकमा ६५८४ मि. को मनाङको चेलु इष्ट सफलतापुर्वक आरोहण गरेको छन् ।
सगरमाथा आरोहण पछि भविष्यमा एकल महिलाहरुलाई अगाडी बढ्नमा हौसला प्रदान गर्ने, विधवा महिलाहरुको क्षेत्रमा काम गर्ने, हिमाल आरोहण सम्बन्धी वृत्तचित्र निमार्ण गर्ने र जलवायु परिर्वतन सम्बन्धी जनचेतना फैलाउने उनीहरुले जानकारी दिएका थिए ।

तस्बिरः  ङवाङ शेरा शेर्पा