श्यार्वी के, रिग्स्इुङ तिवा यार्गे जोपला श्यार्वी चिछोग नाङला मोलोक वाउ लोप्टुक ताङ श्यार्वी स्योनो तिवाला लोप्ज्युङकी थोकला खेन्थोक तेर गोउ खाक्छे वतु ताङ श्यार्वी लोप्टा तिवी वाङ्क्षा ताङ थोप्ताङ तिवी कोर्ला खाक्छेम्बु ल्येगेन ज्योकी वाउ श्यार्वी चिछोग नाङगी छोक्पा यिन् याम्बु श्यार्वी लोप्टुक छोक्पा । याम्बु श्यार्वी लोप्टुक छोक्पी ११ महादिवेशन ढुप्नी महादिवेशन न्ये चिख्यापला चिउ साङ मिङमा श्यार्वा श्यार्वी वाङक्षा, थोप्ताङ ताङ श्यार्वी लोप्टुक तिवाला याम्बा चिछोगकी लोप्टुक ताङ स्योनो तिवा दोके क्यानी गोमाला हुङ थुप गोकी सिरु मिग्युलकी गोमा क्यान वतु स्योनो यिन् । श्यार्वी लोप्टुक छोक्पी च्यिख्याप स्योन्पाला ज्युनी छ्यागलेन नाङगु श्यार्वा ११ महादिवेशन ने छोक्पी चिख्यापला चिन वाई । श्यार्वी स्योन्नो ताङ श्यार्वी लोप्टुक तिवी थोक्ला ल्यारिम कियी वान् वतु श्यार्वी ज्युकी ङिमाला ल्यारिम तिवा चुक क्यान गोमा कि सिरुकी कोर्ला दुकराङ क्यानी श्यार्वी लोप्टुक तिवी मुला क्याउकी अराउरा ।
टसिदेलेक ला, थाङबुरङ ज्यु वेई ।
– लसे, थाङबुरङ वेई ला ।

तिङसाङ क्ष्याग्लेन काङ नङगीन वेत् ?
–तिङसाङ या याम्बु श्यार्वी लोप्टुक छोक्पला देने वोतु तप्की श्यार्वी लोप्टुक तिवी नाङला वतु प्रतिभा तिवा चिछोग नाङला खुन हुङगुला चिछोग छोक्ने श्यर्वा स्योन्नु ताङ श्यार्वी लोप्टुक तिवी यर्गेकी छुल्ला तन्दा किरु लाका तङ ज्युग्थम्बला कि गोउ लाकाकी कोर्ला ल्यारिमकी छ्यार्सी तिवा जोई वेई ला ।
तन्दा आच्यू याम्बु श्यार्वी लोप्टुक छोक्पा याङना नेपाल शेर्पा संघकी चख्यापला ज्युने नो ति तप्की दि यम्बु श्यार्वी लोप्टुक छोक्पी कोर्ला टिक्पेजीक खेन्थोक विनङसिन ।
– लसे दि यम्बु श्यार्वी लोप्टुक छोक्पा ति तन्दा लमे वाङ्गी गोमाला याङना श्यार्वी लोप्टा तिवी कोर्ला लाका किरु सिने गो छुवु कि छोक्पा यिन । खाक्चेवाला दि छोक्पा युलनेसुर लोप्ज्योङकी रिम्बाला यम्बुरला वोउ तङ देरङ सङ लोप्ज्योङ किई वोतु श्यर्वा लोप्टुक ताङ स्योन्नु तिवी यर्गेकी छुल्ला ल्यारिम तिवा गोढिग किरु मिग्युलकी गो छुवु यिन । दि छोक्पी छोकने श्यर्वा लोप्टा तिवा नाङला वतु योन्देन याङना प्रतिभा तिवाला ल्यामो क्याने चिछाग नाङला खुन हुङ ज्यितुला टोङ्गो कितु, रोगराम किरु ताङ श्यर्वा लोप्टुक तिवासाङ स्युङकी दाशा तेरीला हुङ थुप गोकी ताङ दिकी कोर्ला श्यार्वी चिछोग नाङला ल्यारिम नाछोग ताङ टोङगु कोतुरकी ल्यारिम तिवा गोढिग क्याने श्यार्वा लोप्टुक तिवा तन्दा सिसिन ल्हाक्पा शसक्त जोपकी लाका किरु नासम ज्याङ्ग वाई ।
लोप्ज्युङ किई वोसिनङ दुक क्याने श्यर्वा लोप्टुक तिवी यर्गेकी छुल्ला छोक्पा गो चुनी ज्युने क्ष्याग्लेन नङिगन नोक । श्यर्वा चिछोग नाङला छोक्पातिवा माङबो छोकने वोसिनङ श्यर्वा लोप्टुक छोक्पी नाङला याङना सामाजिक संस्थाला ज्युने लाका किरुला ति लोप्टुक तिवाला चो कले तिवा गिनोक ?
– त लोप्ज्योङ किरु रिम्बाला दुक क्याने सामाजिक संस्थाला देने लाका किरुला हुतुङ सिरु यिन्सिन छासे कले गिनोक । ति खलासाङ लोप्टुक तिवायाङ दि चिछोगकी छोक्पी नाङ देनी लाका किरुला माङ ल्हाक्पा राङ कले गिनोक सि गोसुङ लास । तिक्यासिनाङ त चो कलेतिवा वोसिनङ तन्दी दि तुछोला दुक क्याने सामाजिक संस्थाला देने लाका कि गोउ ति सरु खाक्छेम्बु बेई । तन्दा खाक्चेवाला श्यवा ज्योन्दा, ज्योन्मा तिवा याङना लोप्टुकतिवा युलनेसुर दे वोसिमा दाक्पी नाङला वतु प्रतिभा तिवा श्यार्वा यिन्दु तप्कीराङ चिछोग नाङला क्ष्या देन मुथुपु ताङ पल्ज्योरकी जोशा ल्हेन्सी साङ क्ष्या देन मुथुपनोक । दुकराङ क्याने श्यार्वी स्योन्नु तिवा कोले कोले क्यान दाक्पी क्ष्यो रिक्श्युङ तङ ताम तिवा जेने डोप, मि मेलाक्पी मुला स्योर्ने लाका मेलाक्ला तिवा किरु माङबो थोङगीनोक ति तप्की तिवाला लामा ल्येमो हाक को ज्यितुला दुक्रङ क्याने दाक्पू रङ्गी जु तिरङला माल्हाने मिमाङ यर्गेकी छुल्ला नासम तोङ ज्यितुला तङ लुङबाला दाक्पी ओङछा थोप्ताकी कोर्ला सङ हाक कोने ति छुल्ला श्युक ग्यकुलासङ दुक क्याने छोक्पाला देने लाका कि गोकी । त यिन्दु या दाक्पी श्यर्वा चिछोग नाङला छोक्पा तिवा माङबो वोसिनङ छोक्पा तिवा मिङतिरङकी छोक्पा गिनोक । छोक्पी मिग्युलकी छुल्ला नासम ल्येमो ताङन्ये लाका याङना लोव्प्टुक तिवी कोर्ला लाका किरु छोक्पा तिवा सङ अला मिन्दुक । त काँङ यिन्सिनङ दाक्पी श्यार्वी चिछोग नाङला ति दुक क्याने लोप्टुक याङना स्योन्नु तिवी यर्गेकी छुल्ला सिने छुवु छोक्पाला लाका किरु ति कले रङ गिनोक ।
त दुक क्याने श्यर्वा लोप्टुक याङना श्यार्वी स्योन्नु तिवी यर्गेकी छुल्ला लाका ल्यारिमतिवा नाछोक दि छोक्पी किई वोने नोक ति छुल्ला दाक्पी श्यर्वा चिछोगकी मि क्ष्येतिवी दल्जा तङ रोग्रम तिवा चो किनोक ?
– त दि छोक्पा छुने लो वाङी गाल् वाई दि नाङ ङिराकी ल्यारिम नाछोग साङ गोढिग क्यान् सिनसुङ । ति सकला दिकी छुल्ला या ङ दि छोक्पी चिख्याप स्इोन्पाला देने ज्युन या दाक्पी चिछोगकी मि क्ष्ये तङ छोक्पा ग्यर्पु यिन सिरुकी छुर्ने अला तुको रोग्रम तङ दल्जा तिवा कियी वान् वाई ति क्यासिनाङ ज्युकी ङिमाला श्यार्वी चिछोग नाङला छोक्पा ल्हाक्पा सिसिन ल्हाक्पा गो चुन वतु तप्की त ज्युकी ङिमाला ति चो रोगराम गि सिने सि मुथुपी । दि स्याउति याङलुङ तेरीकी रोरम मिकियी सिक्याउ ति मिन् श्यार्वी चिछोग स्यापस्युवा ताङ श्यार्वी चिछोग नाङन्ये श्यार्वी चिछोग यार्गे गलु ल्हाम मिन्लाम वतु मिमाङ तिवा साङ ज्युन वतु तप्की दुको मिग्युल ताङ मिन्लाम वतु श्यार्वा गोठीत तिवी रोगराम साङ किनोक ।
तन्दा ति श्यर्वा लोप्टुक याङना स्योन्नु तिवा दाक्पी ङोटोत दाक्पी ताम तिवा अला मेसेउ तङ सत छुल्ला अला ङ्याम मिकिउ थोङगीनोक ति तप्की हुतुङरङ श्यर्वा स्योन्नु तिवाला श्यर्वी ताम ति चो खाक्छेन्बु यिन्दे ?

– दि ति हुतुङरङ सिरु यिन्सीन सरु खाक्छेन्बु बेई चिला सिसिन दाक्पु चो रङ क्ष्युक्पु वोसिनङ चो रङ बैज्ञानिक युगला गल्सीनङ दाक्पी ङोटोत सिरुती दाक्पी ताम क्ष्यो रिक्श्युङ तङ लुक्सो तिवा यिन । ति तप्की दाक्पी ताम क्ष्यो रिक्स्युङ तङ लुक्सो तिवा तोर्सिन दाक्पी ङोटोत मेतु दोके यिन । ति तप्की दे लोप्टुकतिवा युम्बुरला वोतु तिवा श्यर्वी ताम दोक्पई मेसेउ तङ युलनेसुर वाउ तिवी सङ यम्बुर वासिमा कोले कोले क्यान ज्येने डोई वोतु तप्की ति छुल्ला खाक्चेवाला दाक्पी ङटोत ल्हाने ति छुर्ला नासम तोङगोकी चिला सिसिन दाक्पु चो रङ लापने मि क्ष्ये गल्सीनङ चो रङ टेङ्गा जोने क्ष्युक्पु गल्सीनङ ङोटोत मेसुङ सिसिन काङ मेई, ति तप्की ति छुर्ला ल्येमो क्याने नासम तोङ गोकी ।
तन्दी दि तुछोला श्यर्वा ज्योन्दा तिवा मङ्गा दाक्पी क्ये रिक्श्युङकी छुल्ला अला त्येपा मिकिउदोके थोङिगनोक, खोङतिवाला दाक्पी ङोटोत खाकछेन्बुकी कोर्ला आच्यू ति थोकला क्ष्याग्लेन नङ्गु तप्की काङ सुङनङ्गी ?
– तन्दा हुतुङरङ सिरु यिन्सिन दाक्पु श्यर्वी ताम्ङे लपु मि ति कोले कोले क्याने मङ ङ्युङा ङयुङा डोई नोक ति कोर्ला ति दाक्पु तेरीकी पप कि गोउ ताम यिन । तेरीकी नासम तोङगोउ तिङ तिरङ नोक । तन्दा श्यर्वा इजीनुम उजुनुप पप आमा तिवी सङ दा–दाक्पी पेजा तिवाला ति कोर्ला टोङ्गो कि गोउ खाकछेन्बु वेई । त गोमा ति दाक्पी ङोटोतकी कोर्ला खोङतिवाला अला ल्येमो क्यान खेन्थोक मेतु तप्की सङ ति छुर्ला अला त्येपा माक्याउ यिन सिसिन ज्येन ती दाक्पु श्यर्वी तामतिवा लोपु दासा सङ मेतु तप्की सङ यिन । दाक्पी लुङबी लुङसो ति टिक्पेने ज्युन लोप्टाला गलसीमा ते लोप्टाला रोङबी क्येला तिरङ लाप्ज्योङ लोपु लुक्सो वोतु तङ तुक क्याने श्यर्वी ताम लोपु दासा मेसिमा ति लोपु ताम्ङेसङ माच्युङ तमा तुक क्यासिमा पेजातिवा सङ ते दल्जातिवी मुला दाक्पी क्येला अराउरा किरु नेताङ मेसीमा ति दाक्पी ताम ति कोले कोले क्यान ङ्यामने डोई डोप ति यिन । ति तप्की तेरी सिनाङ खाक्छेन्बुति दाक्पी लोप्टातिवाला ति थुप थुप सग ते श्यर्वी तामकी लोप्ज्योङ कि गोउ टडिक ति कि गोकिनोक । त श्यङुकी क्ष्योगने तङ दाक्पी चठिमला सङ लोप्टातिवाला दा–दाक्पी क्येला लोप्ज्योङ किरु ङेतु सिरु टडिक क्या वेई । त यिन्दुया टडिक तिरङ क्यातिरङ मिसिन तिला गोउ गेगेन तिवा लोपुकी लोप्टातिवी दासा तङ ज्येनतिवी कोर्ला ति याङलोङ अला रोग्रम माच्युङवेई । ति तप्की त ति कोर्ला दाक्पु श्यर्वा छोक्पा तिवा तेरी माङसे स्युक ग्याक गोउ ताम ति काङ नोक सिसिन दाक्पुला ओङछा थोप गोकी सिरुतिरङ मिन्दा क्यान ओङछा या दाक्पुला थोम सिन वोतुकी त ति कोर्ला दाक्पी ताम लोपुला गेगेन तङ गेगेनतिवाला तेर गोउ ल की टडिक कि गोकी सिरु कोर्ला ति श्युक ग्याक गोकीनोक । त ज्येन ति तन्दी नेताङला मङसे श्यर्वी पेजातिवा ति युलला मालापने दे यम्बुर वोने लापसिमा ति दे पप आमी सङ ति कोर्ला अला श्युक माग्याप तङ दाक्पी क्ये रिम्श्युङकी कोर्ला मालापसिमा ति पेजा तिवी लोपु तामङेसङ माच्युङसुङ । तङ खङबी नाङने पङला थेन्सीमा ति श्यर्वी ताम लोपुकी मि रङ मेठेनोक, ति खलासङ रङ्गारङ्गाई श्यर्वी ताम ल्येमो क्यान स्येउ यिन्सिनङ खोङतिवा श्यर्वी ताम ला अराउरा क्यासिन चेई ङोछा किरु चिन्गेइसङ थोङिगनोक त तुक किरुति मेङ्गी । तङ दाक्पु श्यर्वी ताम ति चो खाकछेन्बु वेई सिरु ताम ति तेरीला खेन्थोक तेर थोप्सिन ल्येमु गिवी । त दाक्पु श्यर्वा सिने ङोस्येउ ति दाक्पी ताम रङ यिन । ति तप्की श्यर्वी ताम ति यर्गे जोपला लोप्टाला लोप्ज्यो कि चिने गिवा, खाङबा फमातिवी दा–दाक्पी पेजातिवाला श्यर्वी ताम लापने गिवा, दाक्पु तेरीकि दिक यर्गेकी छुल्ला हुर्तक कि गोकीनोक ।
लसे त आच्यू याम्बू श्यार्वी लोप्टुक छोक्पी चिख्यापला चिने फेप्सिमा ति श्यार्वी लोप्टुक छोक्पी ल्यारिम तिवा चुक क्यानी गोमा किवी ल ?
त छोक्पी ल्यारिम याङ गोमान्ये ज्युन कियी वाउ ल्यारिम तिवाराङ यिन् , ति सिसिन गोमाला ति श्यार्वी लोप्टुक तिवाला चुक क्यानी दाशा च्यिगला ज्योक थुप्की सिरु ताङ श्यार्वी लोप्टुक तिवाला स्युङकी लाका ल्यारिम तिवा छोक्स्यू चुक क्यान ल्हाक्पा सिसिन ल्हाक्पा लाङ थुप्की सिरुकी कोर्ला ति नासाम ताङने ल्यारिम तिवा गोमा किरु नासम वाई । छोक्पी ज्युकी ल्यारिम तिवा छोप्नी छोग्मी तेरीकी मुला छोक्दु देनी तेसुर क्याउ थाक्च्योत न्ये राङ श्यार्वी लोप्टुक छोक्पी ल्यारिम तिवा गोमा क्यान ढिवी ।

लसे त दाक्पु अराउराकी तिङस्योकला सङ लेपसुङ ति तप्की तिङस्योकला अचुकी सुङगोउ सुङ वोसिन सुङनङिसन गि ।
– त तिङस्योकला ङ श्यर्वा लोप्टुक तिवाला तिराङ्ग मिन्दा क्याने श्यार्वी मिमाङ्ग तिवा तेरीला काङ सिरु सिसिन दाक्पु काङ क्यासिनङ दाक्पी लुङकी ठिम तङ दाक्पुला ङे गोउ ओङछातिवी कोर्ला हाक माकोसिन दाक्पी काङ कि मोथापी । त दाक्पी लुङबाला तोङला गोमाने ज्युन रोङबातिवी रङ शासन किई वोउ तप्की दे दाक्पी ओङछा थोप्ताङ तिवा माङे वेई । त यिन्दु या रोङबातिवा राणातिवा शाह तिवा तङ तन्दासङ क्षेत्री बाहुनतिवी शासन क्यासिनङ तिवी ति दाक्पी नेपाल यर्गे तोङ माथोप वेई ति तप्की त ति दाक्पु ज्योन्दा तिवी सङ दाक्पी लुङबी यर्गेकी छुल्ला दा (दाक्पी लोप्ज्योङकी मुलामुलारङ नासम तोङ थोप गोकी । तुक्रङ क्याने दाक्पु श्यर्वा ज्योन्दा तिवी चो रङ योन्देन ल्हाक्पा लापसिनङ तङ टेङ्गा जोसिनङ दाक्पी ताम क्ष्यो रिक्श्युङ तङ लुक्सो तिवा जेतु मेङगी सिने स्योप यिन ।
दुकराङ क्याने श्यर्वा लोप्टा तिवी वाङ्क्षाकी छुल्ला श्यार्वी ह्याम्बु श्यार्वी लोप्टक छोक्पा याङ्ना नेपाल शेर्पा बिद्यार्थी संघ छोक्पा खाक्छेन्बो वेई । सिसिन लोप्टुक याङना स्योन्नो तिवी नाङला वतु प्रतिभा तिवाला चिछोग नाङला तिराङ मिन्दा क्याने जम्बुलिङ्गला राङ क्ष्या देन्दुला नेपाल शेर्पा संघकी आक्षोउ चोई रोगराम किरु नासम ज्याङ वाई तिकी कोर्ला तेरीकी रोगराम खाक्छे वाई । ति तप्की यिगे लापु श्यर्वा स्योन्नो याङना लोप्टा तिवा खाङबाला तिरङ मादेवा क्याने दुको छोक्पाला वोने मि ज्येन दोकेरङ क्यने मिमाङ यर्गेकी छुल्ला लाका किरुला नासम तोङ गाकी । श्यर्वा लोप्टुक तिवा तेरी चिछोग नाङ्ला छोक्पा नाछोगकी गोढिक किरु ल्यारिम ताङ श्यार्वी वाङ्क्षा थोपताङकी कोर्ला साङ याम्बा चिछोगकी दोके क्याने तेरी हुङ्ग थुप गोकी । ति टेमुतिवा खाङबारङ देसिन सिसङ मोथोङगी ति तप्की दुक क्याने पाङला वोने तेरीला क्ष्यादेन थोप्सीन ल्येमो यिन । ति तप्की श्यार्वा तेरीकी लोप्टुक तिवा तेरीकी थोकला गोढिग किरु ल्यारिम तिवाला तेरीकी रोगराम खाक्छे वाई दि ला तेरीकी रोगराम क्यासिन तिराङ छोक्पी लाका ल्यारिम ल्यामु कि थुप्की ।
थुचिछे ।।।