लोसार सिरुती नाङवा याङना बुद्ध धर्मावलम्वी तिवी लो सम्बा फोउला तोसार सिवी । श्यार्वा मिमाङ्ग तिवा नाङवा यिन्दु ताप्की लोसार ति श्यार्वी लो सम्बा यिन् । लोसारकी चि (कालचक्र ज्योतिषशास्त्र)ला च्यि ग्याग्क्युई । श्यार्वा तिवी तुछ्येन ग्याछेम्बुु तिवी नाङला लोसार ति साङ च्यिक यिन् । तासम पयुलला नाङवी छ्योक्पा तिवी नाङला तोलो लोसार, सोनाम लोसार ताङ ग्याल्पो लोसार सिनि लोसार सुम च्यिउकी लोग्सो तेन्दु थोङ्ङी नोक । गुरुङ छोक्पा तिवी तामु लोसार सिनि लेटाङ पौष गते १५ ङीव छेर्मु तोलो लोसार च्यिई नोक । तुराङ क्याने येस्याङ ताङ ह्योल्मु तिवी सोनम लोसार (ल्होछार) सिनि तोलो लोसार कि ला च्यिक तिङ्ला च्यिई नोक । श्यार्वा ताङ प्येपा तिवी ग्योल्पो लोसार च्यिउकी लोग्सो ताङवोङुल्ने राङ होई । ग्याल्पो लोसार ति तोला लोसार ताङ सोनाम लोसार कि तिङला खेल्गिई । परसा परसा लो ला सोनाम ताङ ग्याल्पो लोसार ङिमा च्यिक्ला राङ साङ खेल्गी ।

लोसार चिउ मिमाङ्ग तिवी लोसार हुंगु सिनाङ ङिमा चेई गोमान्ये ज्युन रङ नाम्सा सम्बा चेम्बु ताङ ङ्योप्चा गाक्यु लाका तिवा किवी । दुराङ् क्याने खाङ्वा तिवा चाङ्मा जोपला खाङबी नाङगी तुप्त तिवा थेने क्युरुकी लुक्सो वाई । खाङबाला च्यी ग्याकु ताङ खाप्सा जोने जोकु लाका साङ लो सम्बी गोमाला राङ किवी । (कालचक्र ज्योतिषशास्त्र) च्यिकी ला ११ ताङ छेवा २९ की छेर्मु गोमु गुथुक चोने खाङबी मि ताङ छेङगाछाली तेरी मुला देने गागा टोटो किइ तेरी मुला च्याव लुग्सो साङ वाई ।

छेवा च्यिाग की छेर्मु टोप्ला लाने छ्यी पुङला गाल्नी जुवु चाङमा जोनी छ्यी पुङला साङ पुल्नी छ्यु सम्बा खाङवा खुन वावी ल्हाला येन्छप पुल्गीवी । दुकराङ क्याने छेवा च्यियगकी छेन्मु खाङवा डेसिल, छ्याङर्खा, खाप्सा ताङ हेम्बा साब समा तिवा ल्हाला पुल्ने साङ्ग सेर्कीम क्याने छ्या छ्योपा क्यासिमा खाङवी मि तिवा माज्या सम्बा कोन्नस् राङगी फामा छ्येला क्येका दर्का ताङ खाता श्यूने टाशी मोन्लम लोङगुप लुक्सो वाई । दुराङ क्याने फामा याङना खाङवी मिछे तिवी साङ पेचा तिवाला ढेवा बिने तेरीला टशी मोन्लम तेरुकी लोक्सो वाई ।

श्यार्वी लुङवा लुङवाला रारङ्गी छोक्पी मिमाङ तिवा जोम्ने गोन्पाला ल्हाप्सो कितु कि लुक्सो होई । तुराङक्याने याम्बुला जुबु मिमाङ तिवा साङ याम्बु श्यार्वा गोन्पाला लो सम्बी छेवा सुमगी छेर्मु जोम्ने (¥याली) क्याने मिमाङ तेरी मुला ल्हाप्सो बुलग्यिई । तुराङक्याने जाम्बुलीङकी सेम्च्येमथाम्चेनला किर्मु हुँसिन सिने ठाग थेन्बु ताङ चाङबुला लुङतार साङ ग्याकु लुग्सो होई । ल्हाप्सो क्याने सिन्सिमा श्यार्वी च्यिछ्योग नाङला मिमाङ तेरी दासा च्यिक्ला जोम्ने लोसार कि टाशीदेलेग तेरु ताङ लाङ्गु किईदै गागाटोटो किउ । छिग्याला जुवु श्यार्वा तिवी साङ राङ ज्युवु लुङबा लुङबाला श्यावी छोक्पा जोने लोसार च्यिउकी लुक्सो ज्याङनी श्यार्वी ताम, क्षो ताङ रिक्स्युङ सुङक्योप किरु लाका किइ होनी होई । दाक्पी लुक्सो राङ्गी ङोशी यिन्दु ताप्की श्यार्वा तिवा जाम्बुलीङला कानी ज्युसिनाङ राङगी लुक्सो ङ्याम डोमिजिबु कोर्ला सुङक्योप किगोकुई । पयुल ताङ छ्यीग्याला ज्युवु मिमाङ तेरीला ङिङ थाक्पाने ज्युन टशी देलेग बुलु यिन् । टशीदेलेग ।