श्यर्वा मिमाङला च्युङ्गु किदुक ल्हाप तङ यर्गेकी छुल्ला लाका ग्यछेन्बो क्याउ आङ दोर्जे शेर्पी टेन्सो तुछेनला शेर्पा सेवा केन्द्रकी ल्यारिमशिक कोटिक क्याने आङ दोर्जे शेर्पाला टेन्दा क्इा वेई ।  साउन लाकी गते च्युरुक छेन्मु शेर्पा सेवा केन्द्र बौद्ध टुसालला कोटिक क्याउ ल्यारिमला ल्यारिमकी डेन्बु चोवो तिवा ज्युसुङ । क्याने ल्यारिमला मिकसलगी डेन्बुतिवाल गोमी चठिम ल्हेन्छोग छोक्मे जीप छिरिङ लामा, शेर्पा सेवा केन्द्रकी टोत्योन्पा तिवा खेन्पो ङवाङ लुडुप, सोनाम ग्याल्जेन शेर्पा, यम्बु श्यर्वा पुमपेजी चिछोगकी चिख्याप ङिमी शेर्पा, कङग्युत श्यर्वा रिक्ने तेवी चिख्याप छिरिङ्ग शेर्पा, शेर्पा संचार समुह नेपालकी टोत्योन्पा याङना सारगोत्पा नुरु छेपाल शेर्पा, तङ ज्येन छोक्पा नाछोककी चिख्याप तङ कुछपतिवा माङबो फेप्सुङ्ग । ल्यारिमकी गोम्स्योकला शेर्पा सेवा केन्द्रकी चिख्यपा सोनाम छोटी श्यार्वी ल्यारिमकी चोडेन तङ डेन्बुतिवा तेरीला फेप्श्यू सुङस्येत नाङसुङ् । सुङस्येन नङगु रिम्बाला खोङकी आङ दोर्जे लामा तोङबी दाक्पी चिछोग यर्गे जोपला क्यानङ्गु लाका तिवी कोर्ला सङ स्येनाङसुङ ।

ल्यारिम गोपेत नङसीमा ल्यारिमकी चोडेन, डेन्बोतिवा तङ मिमाङ तेरीकी शेर्पा सेवा केन्द्रला जोने वोतु आङदोर्जे लामी कु ला खतक तङ मेन्दोक ताने खोङकी क्याउ लाकाला थुचिछे स्युयी टेन्सो क्या वेई । तुक्रङ क्याने ल्यारिमला फेउ डेन्बुतिवी दा–दाक्पी सुङस्येत नङगु रिम्बाला आङ दोर्जे लामी मिमाङ यर्गेकी छुल्ला क्याउ लाका सरु ल्यामो तङ फेनछेन्मो वोतु सुङवेई । ति नङसीन यम्बु श्यर्पा पुमपेजी चिछोगकी चिख्याप ङिमी शेर्वी शेर्वा मिमाङकी यर्गेकी छुल्ला आङ दोर्जे लामी क्याउ लाका गैरोकी यर्गेकी छुल्ला वोतु तप्की दाक्पी खोङला नरी नासम तङने चि गोकी सुङस्येत् ज्याकिन् मि क्येसीमा सिरङ गोकी, यिन्सिनङ लाका ग्याक्षेन्बो क्यासिन मि जु टुङगु ज्युला सङ मिङ ग्यक्षेन्बो हुङ्गु सुङसुङ । ल्यारिमला शेर्पा सेवा केन्द्रकी टुङ्यिग छेन्पो आङ ग्याल्जी श्यार्वी सङ सुङस्येत नङगीन ताङबो यम्बुरला श्यर्वा तिवा अला मेतु बेला ने ज्यु आङ दोर्जे लामी चिछोगला देने लाका किरु तङ कलेला स्योरु मिमाङतिवाला रोग्रम तङ दल्जा किरुकी लाका क्यानङ्गु तप्की खोङ मिङ तन्दासङ मिमाङगी चिई वतु सुङसुङ ।
दुकराङ क्यानी खोङकी आङ दोर्जे लामाला नासम तङने खोङकी मिमाङ यर्गेकी छुल्ला क्याउ लाकाला दाक्पी सङ पे ल्हगोउ सुङसुङ । ल्यारिमकी तिङस्योकला ल्यारिमला फेप्ने ल्यारिम लम्सु जो बिन्दुला ल्यारिमकी चोडेन, डेन्बुतिवा तङ मिमाङ तेरीला थुचिछे स्युयी शेर्पा सेवा केन्द्रकी चिख्याप सोनाम छोटी शेर्वी मिमाङ तेरीकी सुङगु सुङ नङसीन आङ दोर्जे लामी मिमाङ यर्गेकी छुल्ला लाका माङबो तङ फेनछेन्बो क्याउ नासम ताङनाङसुङ । तुक्रङ क्याने दि ल्यारिम आङ दोर्जे लामा टुङ्गु ङिमाला शेर्पा सेवा केन्द्रकी दि सिसिन लो गोमान्ये ज्युन नरी लोरिम कोटिक कियी वान् वतु सुङस्येत ज्यागनाङगिन ल्यारिम डुपु ख्येलेन क्यानाङसुङ ।

लो २१ गोमाला ल्यारिम कोटिक ङिमाला मिमाङ यर्गेकी छुल्ला लाका किई वोतु कपला आङ दोर्जे लामा शेर्पा थाइ नम्डुक धाप्ने नाशा गलु यिन । ति कपला खोङकी मुला खोङकी दकमो पासाङ फुटी शेर्पा सङ मुलारङ नाशा गलु यिन । तन्दा शेर्पा मिमाङला किदुक फेन्दु दासा शेर्पा सेवा केन्द्रसङ खोङकी सङ श्यूक ग्याप्ने गो चुवु छोक्पा यिन सिसिन सरस्योगकी छुल्ला तिङसङकी राजधानी दैनिक सङ खोङ आङ दोर्जे लामी तोङला राजधानी साप्ताहिक सिने गो चुवु यिन । आङ दोर्जे लामा नेपालला प्रजातन्त्रकी छुल्ला सङ स्युग ग्यकिन नेपाली काँग्रेसला स्युवु यिन । खोङ विपी कोइरला, गणेशमान सिंहकी मुला सङ लो माङबो मुलारङ लाका क्याउ मि यिन्नोक । मिमाङ यर्गेकी छुल्ला खोङकी तङगु नासम ग्यर्पो तङ ज्युगथम्बला मिमाङ माङबोला फेन्दु वोतु तप्की मिमाङ माङबोकी जु नाशा गलसीनङ तन्दा सग चिइ वो वेई ।

शिङ श्येकपा आङ दार्जी श्यार्वा श्यार्वी किदुगकी डोताङ जो ल्हामु जोपला गो चुवु शेर्पा सेवा केन्द्रला तिङसाङ खोङकी मिग्युलला चिकोर कियी श्यार्वा गागा पोगो तिवाला अराउरा ताङ क्ष्यो ङेन्दु दाशा याङ्ना बृद्ध मिलन केन्द्र साङ गो चुन वाई । दुकराङ क्यानी किदुग खेल्ने फेउ मिमाङ्ग तिवाला ङ्योप्चे ग्याकुला जो ल्हामु हुङ्सी सिन् श्यार्वा केन्द्रला राङ छोङखाङ साङ ज्याङ वाई सिसिन बृद्ध मिलन केन्द्रला फेउ मिमाङ्ग ताङ श्यार्वा तिवाला अराउरा क्यान ज्युवुला साखाङ्ग साङ ज्याङ वाई । श्यार्वी ल्हाखाङ्ग याङना शेर्पा सेवा केन्द्रकी गो चुवु घेन्सोखाङ गावा गुवा तिवाला मेन ताङ तकच्योथत किरुला मेङखाङ्ग साङ ज्याङ वाई । शेर्पा सेवा केन्द्रकी आङ दोर्जी श्यार्वी टेन्सोला ठगकी जिन्बा तोङगु याङना रक्तदान ल्यारिम साङ गो चुने खोङकी देप्पा नाङसिन गोढिग क्याने आङ दोर्जी श्यार्वी टेन्सोकी ल्यारिम ढुप्सुङ्ग ।